محاشي سورية
- كيلو باذنجان
- كيلو كوسا
- 5 فليفلة حمرا و صفرا و خضرا
- 3 جزرات
- 5 بطاطا
- 0.5 كيلو رز تقريبا
- شدة بقدونس
- 5 بندورات مقشرة و مقطعة مكعبات صغيرة
- 400 غ لحمة مفرومة
- راسين توم
- 2 كيلو بندورة للصلصة
- سمنة
- زيت زيتون
- ملح
- ملح ليمون
- بهارات لحمة
- فلفل اسود
- نعناع
- 1 نحفر الخضار و نغسلها
- 2 الحشوة: بصينية كبيرة نحط تقريبا نص كيلو رز او اقل على حسب الكمية اللي بدك تعمليها و نضيف عليه ٥ بندورات مقشرة و مقطعة ناعم
- 3 نضيف كمان راس توم مفروم ناعم و شدة بقدونس مفرومة ناعم و اللحمة المفرومة و البهارات نضيف الكمية حسب زوق كل وحدة و نخلط منيح كتير و نذوق لو ناقص ملح او بهار معين
- 4 بعدها نضيف ٥ ملاعق سمنة و ٥ ملاعق زيت زيتون و نرجع نخلط منيح
- 5 نبدا نحشي و نحاول ما نملي الباذنجان او الكوسا او اي خضرا بتحشيها للاخر، نخلي شوية فراغ مشان الرز يستوي منيح
- 6 نجيب الطنجرة و نحط عليها عظام لحمة او شرايح بطاطا او فول و بعدها نوزع المحاشي و نحط بالنص راس توم كاملة للطعمة
- 7 الصلصة : نغسل الكيلوين يندورة و نقطعها و نحطها بطنجرة عالنار لمدة نص ساعة تقريبا... بعد ما تبرد شوي نعصرها بمصفاية و نرمي القشر
- 8 و نضيف لعصير البندورة مي مشان ما تطلع ثقيلة (تقريبا لتر مي) على حسب ما تحبو الصلصة تكون... و نملحها و نحطلها شوية سمنة و ملح ليمون... نحط كمية صلصة عالطنجرة اللي فيها المحشي
- 9 نحطها هالنار بالاول عالنار العالي و يكون عليها ثقل مشان ما يطلع الرز من المحاشي و بعد ساعة تقريبا نخفف النار لتستوي على مهلها و قبل ما نشيل الطنحرة من النار بنص ساعة نشيل الثقل من عليها و نغطيها الطنجرة
- 10 انا بتركا ٣ ساعات تستوي عالاخر لان بحب الاكل مستوي كتير و يذوب بتمي
يجب عليك تسجيل الدخول لتتمكن من التعليق وإضافة تجربتك لهذه الوصفه
